Ang Araling Aktibista ay para sa lahat ng organisadong masa na nakapag-aral na ng Maikling Kurso sa Lipunan at Rebolusyong Pilipino (MKLRP). Pero prayoridad at kailangan itong ibigay sa mga aktibistang nasa mga komiteng pang-organisa at grupong pang-organisa at may karanasan na sa pagkilos sa rebolusyonaryong kilusan, sa kanayunan man o sa kalunsuran. Mahalaga ito sa pagbubuo ng matatag na gulugod at ubod ng pamumuno sa mga rebolusyonaryong samahan at kilusang masa.

"Mahalagang pag-aralan ang buhay ng mga dakilang gurong komunista, sina Karl Marx, Frederik Engels, Vladimir Lenin, Joseph Stalin at Mao Zedong. .... Ipinamalas ng kanilang buhay ang walang hanggang pagpapahalaga sa kanilang pagtataguyod ng proletaryong rebolusyon, at sa kanilang gabundok na pagmamalasakit sa lahat ng kasamang rebolusyonaryo at mamamayan. Tayong naniniwala sa proletaryong rebolusyon at mga Komunista ay dapat matuto sa kanila."

"Si Kasamang Mao Zedong ay kabilang sa walang kamatayang samahan ng mga dakilang komunistang lider – sina Marx, Engels, Lenin at Stalin. Komprehensibo at buong talino niyang minana, ipinagtanggol at pinaunlad ang Marxismo-Leninismo. Inilapat niya ang unibersal na teorya ng rebolusyonaryong proletaryado sa kongkretong praktika ng rebolusyong Tsino at nagkamit ng matutunog na tagumpay na may pandaigdigang istorikong kahalagahan"